Niandohan’ny ankohonana

Ny fiandohan’ny ankohonana dia ao amin’Andriamanitra. Ny zava-manan’aina rehetra dia avy amin’ilay Fianakaviana Masina, izay noharin’Andriamanitra Ray, Andriamanitra Zanaka ary Andriamanitra Fanahy Masina, toy izay koa ireo zava-manan’aina any an-danitra: ireo anjely, ireo arakanjely, ireo kerobima sy ireo serafima - tahaka ireo olombelona. Izao tontolo izao dia avy amin’ny Trinite Masina, noho izany, ny ankohonan’ny olombelona dia tsy ho sambatra tanteraka raha tsy voahorina ao anatin’ny fanahin’ny Ankohonan’Andriamanitra. Ny zanaka dia voahary ho voninahitr’ ireo ray aman-dreny, ny fianakavian’olom-belona dia nohariana ho voninahitr’ Andriamanitra mandrakizay.

Ny toro-làlana avy any ambony izay nankasitraka ny fitomboan’ny fianakaviana voalohany dia nanana antony iray, dia ny fahafantarana ny fahalavorariany. Tsy misy fahotana, dia azo antoka mihitsy, fa tonga lafatra ireo ankizy. Ireo ankizy dia hanome voninahitra mandrakizay ireo ray aman-dreniny, ary amin’ny alalan’izy ireo, Ilay Nahary. Fa rehefa nanapaka ny fifandraisany amin’Andriamanitra, ka nikomy nanohitra Azy ka nanetry tena tamin’ny devoly ny olombelona, ilay ankohonana voalohany dia nanary ny fahadiovany, ny fahamasinany sy ny fahalavorariany, ka nanome fahaterahana zanaka izay mpikomy mihoatra noho ny ray aman-dreniny.

Noho izany, ny Tany, izay tokony nosahanin’ny fianakaviana lavorary, dia lasa ireo zanak’ireo mpikomy no nisahana azy, ka nahatonga ny fahasimbana tanteraka ny olombelona. I Jesosy Tompo àry dia tonga eto amin’izao tontolo izao mba hanarina indray ny lanja manjaka ara-moraly sy ny lanja manjaka  aram-panahy, talohan’ny fianjeran’olombelona. Amin’ny fankatoavana ny Teniny, ny fanjakan’Andriamanitra dia ho voahorina ao am-pon’ny tsirairay avy. Raha toa ka miaina fiainana kristianina mifanaraka amin’ny Baiboly ny olon-droa, dia lasa ho sombin-danitra kely ny tokatranony, ireo zanany dia mpankatoa ka sambatra ny fianakaviana: “Ary Andriamanitra nahary ny olona tahaka ny endriny; tahaka ny endrik’Andriamanitra no namoronany azy; lahy sy vavy no namoronany azy” (Genesisy 1: 27)